अशोक -जयशंकर प्रसाद  हिन्दी देवनागरी में पढ़ें।

Icon-edit.gif is lekh ka punarikshan evn sampadan hona avashyak hai. ap isamen sahayata kar sakate hain. "sujhav"

poot-salila bhagirathi ke tat par chandralok men maharaj chakravarti ashok tahal rahe hain. thodi door par ek yuvak khada hai. sudhakar ki kiranon ke sath netr-taraon ko milakar sthir drishti se maharaj ne kaha-vijayaketu, kya yah bat sach hai ki jain logon ne hamare bauddh-dharmachary hone ka janasadharan men pravad phailakar unhen hamare viruddh uttejit kiya hai aur paundravardhan men ek buddhamoorti todi gayi hai?

vijayaketu-maharaj, kya apase bhi koee jhooth bolane ka sahas kar sakata hai?

ashok-manushy ke kalyan ke liye hamane jitana udyog kiya, kya vah sab vyarth hua? bauddhadharm ko hamane kyon pradhanata di? isiliye ki shanti phailegi, desh men dvesh ka nam bhi n rahega, aur usi shanti ki chhaya men samaj apane vanijy, shilp aur vidya ki unnati karega. par nahin, ham dekh rahe hain ki hamari kamana poorn hone men abhi anek badhaen hain. hamen pahale unhen hatakar marg prashast karana chahiye.

vijayaketu-dev ! apaki kya agya hai?

ashok-vijayaketu, bharat men ek samay vah tha, jab ki isi ashok ke nam se log kanp uthate the. kyon? isiliye ki vah bada kathor shasak tha. par vahi ashok jab se bauddh kahakar sarvatr prasiddh hua hai, usake shasan ko log komal kahakar bhoolane lag gaye hain. astu, tumako chahiye ki ashok ka atnk ek bar phir phaila do; aur yah agya pracharit kar do ki jo manushy jainon ka sathi hoga, vah aparadhi hoga; aur jo ek jain ka sir kat lavega, vah puraskrit kiya javega.

vijayaketu-(kanpakar) jo maharaj ki agya!

ashok-jao, shighr jao.

vijayaketu chala gaya. maharaj abhi vahin khade hain. noopur ka kalanad sunaee pada. ashok ne chaunkakar dekha, to bis-pachis dasiyon ke sath maharani tishyarakshita chali a rahi hain.

ashok-priye! tum yahan kaise?

tishyarakshita-prananath! sharir se kahin chhaya alag rah sakati hai? bahut der huee, mainne suna tha ki ap a rahe hain; par baithe-baithe ji ghabada gaya ki ane men kyon der ho rahi hai. phir dasi se gyat hua ki ap mahal ke niche bahut der se tahal rahe hain. isiliye main svayn apake darshan ke liye chali aee. ab bhitar chaliye!

ashok-main to a hi raha tha. achchha chalo.

ashok aur tishyarakshita samip ke sundar prasad ki or badhe. dasiyan pichhe thin.

bhag 2

rajakiy kanan men anek prakar ke vriksh, surabhit sumanon se bhare jhoom rahe hain. kokila bhi kook-kook kar am ki dalon ko hilaye deti hai. nav-vasnt ka samagam hai. malayanil ithalata hua kusum-kaliyon ko thukarata ja raha hai.

isi samay kanan-nikatasth shail ke jharane ke pas baithakar ek yuvak jal-lahariyon ki tarng-bhngi dekh raha hai. yuvak bade saral vilokan se kritrim jalaprapat ko dekh raha hai. usaki manohar lahariyan jo bahut hi jaldi-jaldi lin ho srot men milakar saral path ka anukaran karati hain, use bahut hi bhali maloom ho rahi hain. par yuvak ko yah nahin maloom ki usaki saral drishti aur sundar avayav se vivash hokar ek ramani apane param pavitr pad se chyut hona chahati hai.

dekho, us lata-kunj men, pattiyon ki ot men, do nilamani ke saman krishnatara chamakakar kisi adrishy ashchary ka pata bata rahe hain. nahin-nahin, dekho, chandrama men bhi kahin tare rahate hain? vah to kisi sundari ke mukh-kamal ka abhas hai.

yuvak apane anand men magn hai. use isaka kuchh bhi dhyan nahin hai ki koee vyaghr usaki or alakshit hokar ban chala raha hai. yuvak utha, aur usi kunj ki or chala. kisi prachchhann shakti ki prerana se vah usi lata-kunj ki or badha. kintu usaki drishti vahan jab bhitar padi, to vah avakh ho gaya. usake donon hath ap jut gaye. usaka sir svayn avanat ho gaya.

ramani sthir hokar khadi thi. usake hriday men udveg aur sharir men kamp tha. dhire-dhire usake honth hile aur kuchh madhur shabd nikale. par ve shabd spasht hokar vayumandal men lin ho gaye. yuvak ka sir niche hi tha. phir yuvati ne apane ko sambhala, aur boli-kunal, tum yahan kaise? achchhe to ho?

mataji ki kripa se-uttar men kunal ne kaha.

yuvati mand muskan ke sath boli-main tumhen der se yahan chhip kar dekh rahi hoon.

kunal-maharani tishyarakshita ko chhipakar mujhe dekhane ki kya avashyakata hai?

tishyarakshita-(kuchh kampit svar se) tumhare saundary se vivash hokar.

kunal-(vismit tatha bhayabhit hokar) putr ka saundary to mata hi ka diya hua hai.

tishyarakshita-nahin kunal, main tumhari prem-bhikharini hoon, rajarani nahin hoon; aur n tumhari mata hoon.

kunal-(kunj se bahar nikalakar) mataji, mera pranam grahan kijie, aur apane is pap ka shighr prayashchit kijiye. jahan tak sambhav hoga, ab ap is pap-mukh ko kabhi n dekhengi.

itana kahakar shighrata se vah yuvak rajakumar kunal, apani vimata ki bat sochata hua, upavan ke bahar nikal gaya. par tishyarakshita kinkartavyavimoodh hokar vahin tab tak khadi rahin, jab tak kisi dasi ke bhooshan-shabd ne usaki moh-nidra ko bhng nahin kiya.

3

shrinagar ke samipavarti kanan men ek kutir ke dvar par kunal baitha hua dhyanamagn hai. usaki sushil patni usi kutir men kuchh bhojan bana rahi hai.

kutir svachchh tatha usaki bhoomi parishkrit hai. shanti ki prabalata ke karan pavan bhi usi samay dhire-dhire chal raha hai.

kintu vah shanti der tak n rahi, kyonki ek daudata hua mrigashavak kunal ki god men a gira, jisase usake dhyan men vighn hua, aur vah khada ho gaya. kunal ne us mrigashavak ko dekhakar samajha ki koee vyaghr bhi isake pichhe ata hi hoga. par jab koee use n dekh pada, to usane us mrigashavak ko apani stri ‘dharmarakshita’ ko dekar kaha-priye! kya tum isako bachche ki tarah palogi?

dharmarakshita-prananath, hamare aise vanachariyon ko aise hi bachche chahiye.

kunal-priye! tumako hamare sath bahut kasht hai.

dharmarakshita-nath, is sthan par yadi sukh n mila, to main samajhoongi ki snsar men bhi kahin sukh nahin hai.

kunal-kintu priye, kya tumhen ve sab raj-sukh yad nahin ate? kya unaki smriti tumhen nahin satati? aur, kya tum apani marm-vedana se nikalate hue ansuon ko rok nahin letin! ya ve sachamuch hain hi nahin?

dharmarakshita-pranadhar! kuchh nahin hai. yah sab apaka bhram hai. mera hriday jitana is shant van men anandit hai, utana kahin bhi n raha. bhala aise svabhavavardhit, saral-sidhe aur sumanavale sathi kahan milate? aisi mridula lataen, jo anayas hi charan ko choomati hain, kahan us janarav se bhare rajakiy nagar men mili thin? nath, aur sach kahana, (mrig ko choomakar) aisa pyara shishu bhi tumhen aj tak kahin mila tha? tis par bhi apako apani vimata ki kripa se jo du:kh milata tha, vah bhi yahan nahin hai. phir aisa sukhamay jivan aur kaun hoga?

kunal ke netr ansuon se bhar aye, aur vah uthakar tahalane lage. dharmarakshita bhi apane kary men lagi. madhur pavan bhi us bhoomi men usi prakar chalane laga. kunal ka hriday ashant ho utha, aur vah tahalata hua kuchh door nikal gaya. jab nagar ka samipavarti prant use dikhaee pada, tab vah ruk gaya aur usi or dekhane laga.

bhag 4

panch-chh: manushy daudate hue chale a rahe hain. ve kunal ke pas pahunchana hi chahate the ki unake pichhe bis ashvarohi dekh pade. ve sab-ke-sab kunal ke samip pahunche. kunal chakit drishti se un sabako dekh raha tha.

age daudakar anevalon ne kaha-maharaj, ham logon ko bachaiye.

kunal un logon ko pichhe karake ap age datakar khada ho gaya. ve ashvarohi bhi us yuvak kunal ke apoorv tejomay svaroop ko dekhakar sahamakar, usi sthan par khade ho gaye. kunal ne un ashvarohiyon se poochha-tum log inhen kyon sata rahe ho? kya in logon ne koee aisa kary kiya hai, jisase ye log nyayat: dandabhagi samajhe gaye hain?

ek ashvarohi, jo un logon ka nayak tha, bola-ham log rajakiy sainik hain, aur raja ki agya se in vidharmi jainiyon ka badh karane ke liye aye hain. par ap kaun hain, jo maharaj chakravatrti devapriy ashokadev ki agya ka virodh karane par udyat hain?

kunal-chakravarti ashok! vah kitana bada raja hai?

nayak-moorkh! kya too abhi tak maharaj ashok ka parakram nahin janata, jinhonne apane prachand bhujadand ke bal se kaling-vijay kiya hai? aur, jinaki rajy-sima dakshin men keral aur malayagiri, uttar men sindhukosh-parvat, tatha poorv aur pashchim men kirat-desh aur patal hain! jinaki maitri ke liye yavan-nripati log udyog karate rahate hain, un maharaj ko too bhalibhanti nahin janata?

kunal-parantu isase bhi bada koee samrajy hai, jisake liye kisi rajy ki maitri ki avashyakata nahin hai.

nayak-is vivad ki avashyakata nahin hai, ham apana kam karenge.

kunal-to kya tum log in anath jivon par kuchh daya n karoge?

itana kahate-kahate rajakumar ko kuchh krodh a gaya, netr lal ho gaye. nayak us tejasvi moorti ko dekhakar ek bar phir saham gaya.

kunal ne kaha-achchha, yadi tum n manoge, to yahan ke shasak se jakar kaho ki rajakumar kunal tumhen bula rahe hain.

nayak sir jhukakar kuchh sochane laga. tab usane apane ek sathi ki or dekhakar kaha-jao, in baton ko kahakar, doosari agya lekar jald ao.

ashvarohi shighrata se nagar ki or chala. shesh sab log usi sthan par khade the.

thodi der men usi or se do ashvarohi ate hue dikhaee pade. ek to vahi tha,jo bheja gaya tha, aur doosara us pradesh ka shasak tha. samip ate hi vah ghode par se utar pada aur kunal ka abhivadan karane ke lie badha. par kunal ne rok kar kaha-bas, ho chuka, mainne apako isaliye kasht diya hai ki in nirih manushyon ki hinsa ki ja rahi hai.

shasak-rajakumar! apake pita ki agya hi aisi hai, aur apaka yah vesh kya hai?

kunal-isake poochhane ki koee avashyakata nahin, par kya tum in logon ko mere kahane se chhod sakate ho?

shasak-(du:khit hokar) rajakumar, apaki agya ham kaise tal sakate hain, (thaharakar) par ek aur bade du:kh ki bat hai.

kunal-vah kya?

shasak ne ek patr apane pas se nikalakar kunal ko dikhalaya. kunal use padhaqar chup raha, aur thodi der ke bad bola-to tumako is agya ka palan avashy karana chahiye.

shasak-par, yah kaise ho sakata hai?

kunal-jaise ho, vah to tumhen karana hi hoga.

shasak-kintu rajakumar, apake is dev-sharir ke do netr-ratn nikalane ka bal mere hathon men nahin hai. han, main apane is pad ka tyag kar sakata hoon.

kunal-achchha, to tum mujhe in logon ke sath maharaj ke samip bhej do.

shasak ne kaha-jaisi agya.

bhag 5

paundravardhan nagar men hahakar macha hua hai. nagar-nivasi pray: udvign ho rahe hain. par visheshakar jain logon hi men khalabali machi huee hai. jain-ramaniyan, jinhonne kabhi ghar ke bahar pair bhi nahin rakkha tha, chhote shishuon ko liye hue bhag rahi hain. par jayn kahan? jidhar dekhati hain, udhar hi sashastr unmatt kal bauddh log unmatton ki tarah dikhaee padate hain. dekho, vah stri, jisake kesh parishram se khul gaye hain-god ka shishu alag machal kar ro raha hai, thakakar ek vriksh ke niche baith gayi hai; are dekho! dusht nirday vahan bhi pahunch gaye, aur us stri ko satane lage.

yuvati ne hath jodakar kaha-ap log du:kh mat dijiye. phir usane ek-ek karake apane sab abhooshan utar diye aur ve dusht un sab alnkaron ko lekar bhag gaye. idhar vah stri nidra se klant hokar usi vriksh ke niche so gayi.

udhar dekhiye, vah ek rath chala ja raha hai, aur usake parde hatakar bata rahe hain ki usamen stri aur purush tin-char baithe hain. par sarathi us oonchi-nichi patharili bhoomi men bhi un logon ki or bina dhyan diye rath shighrata se liye ja raha hai. soory ki kiranen pashchim men pili ho gayi hain. charon or us path men shanti hai. keval usi rath ka shabd sunaee padata hai, jo abhi uttar ki or chala ja raha hai.

thodi hi der men vah rath sarovar ke samip pahuncha aur rath ke ghode hanphate hue thakakar khade ho gaye. ab sarathi bhi kuchh n kar saka aur usako rath ke niche utarana pada.

rath ko ruka janakar bhitar se ek purush nikala aur usane sarathi se poochha-kyon, tumane rath kyon rok diya?

sarathi-ab ghode nahin chal sakate.

purush-tab to phir badi vipatti ka samana karana hoga; kyonki pichha karane vale unmatt sainik a hi pahunchenge.

sarathi-tab kya kiya jay? (sochakar) achchha, ap log is samip ki kuti men chaliye, yahan koee mahatma hain, vah avashy ap logon ko ashray denge.

purush ne kuchh sochakar sab arohiyon ko rath par se utara, aur ve sab log usi kuti ki or agrasar hue.

kuti ke bahar ek patthar par adhed manushy baitha hua hai. usaka paridhey vastr bhikshuon ke saman hai. rath par ke log usi ke samane jakar khade hue. unhen dekhakar vah mahatma bole-ap log kaun hain aur kyon aye hain?

usi purush ne age badhaqar, hath jodakar kaha-mahatmanh-ham log jain hain aur maharaj ashok ki agya se jain logon ka sarvanash kiya ja raha hai. at: ham log pran ke bhay se bhag kar anyatr ja rahe hain. par marg men ghode thak gaye, ab ye is samay chal nahin sakate. kya ap thodi der tak ham logon ko ashray dijiyega?

mahatma thodi der sochakar bole-achchha, ap log isi kuti men chale jaiye.

stri-purushon ne ashray paya.

abhi un logon ko baithe thodi hi der huee hai ki akasmath ashv-pad-shabd ne sabako chakit aur bhayabhit kar diya. dekhate-dekhate das ashvarohi us kuti ke samane pahunch gaye. unamen se ek mahatma ki or lakshy karake bola-o bhikshu, kya toone apane yahan bhage hue jain vidharmiyon ko ashray diya hai? samajh rakh, too ham logon se bahana nahin kar sakata, kyonki unaka rath is bat ka thik pata de raha hai.

mahatma-sainikon, tum unhen lekar kya karoge? mainne avashy un dukhiyon ko ashray diya hai. kyon vyarth nar-rakt se apane hathon ko rnjit karate ho?

sainik apane sathiyon ki or dekhakar bola-yah dusht bhi jain hi hai, oopari bauddh bana hua hai; ise bhi maro.

‘ise bhi maro’ ka shabd goonj utha, aur dekhate-dekhate us mahatma ka sir bhoomi men lotane laga.

is kand ko dekhate hi kuti ke stri-purush chilla uthe. un nar-pishachon ne ek ko bhi n chhoda! sabaki hatya ki.

ab sab sainik dhan khojane lage. mrit stri-purushon ke abhooshan utare jane lage. ek sainik, jo us mahatma ki or jhuka tha, chilla utha. sabaka dhyan usi or akarshit hua. sab sainikon ne dekha, usake hath men ek angoothi hai, jis par likha hai, ‘vitashok’!

bhag 6

maharaj ashok ke bhaee, jinaka pata nahin lagata tha, vahi ‘vitashok’ mare gaye! charon or upadrav shant hai. paundravardhan nagar prashant samudr ki tarah ho gaya hai.

maharaj ashok pataliputr ke samrajy-sinhasan par vicharapati hokar baithe hain. rajasabha ki shobha to kahate nahin banati. suvarn-rachit bel-booton ki karigari se, jinamen mani-maniky sthananukool bithaye gaye hain. maury-sinhasan-madandar bharatavarsh ka vaibhav dikha raha hai, jise dekhakar parasik samrat ‘dara’ ke sinhasan-mandir ko grik log tuchchh drishti se dekhate the.

dharmadhikari, pradvivak, mahamaty, dharm-mahamaty rajjuk, aur senapati, sab apane-apane sthan par sthit hain. rajakiy tej ka sannata sabako maun kiye hai.

dekhate-dekhate ek stri aur ek purush us sabha men aye. sabhasthit sab logon ki drishti ko purush ke avanat tatha bade-bade netron ne akarshit kar liya. kintu sab nirav hain. yuvak aur yuvati ne mastak jhukakar maharaja ko abhivadan kiya.

svayn maharaja ne poochha-tumhara nam?

uttar-kunal.

prashn-pita ka nam.

uttar-maharaj chakravarti dharmashok.

sab log utkantha aur vismay se dekhane lage ki ab kya hota hai, par maharaj ka mukh kuchh bhi vikrit n hua, pratyut aur bhi gambhir svar se prashn karane lage.

prashn-tumane koee aparadh kiya hai?

uttar-apani samajh se to mainne aparadh se bachane ka udyog kiya tha.

prashn-phir tum kis tarah aparadhi banaye gaye?

uttar-takshashila ke mahasamant se poochhiye.

maharaj ki agya hote hi shasak ne abhivadan ke uparant ek patr upasthit kiya, jo ashok ke kar men pahuncha.

maharaj ne kshan-bhar men mahamaty se phirakar poochha-yah agya-patr kaun le gaya tha, use bulaya jay.

patravahak bhi aya aur kampit svar se abhivadan karate hue bola-dharmavatar, yah patr mujhe mahadevi tishyarakshita ke mahal se mila tha, aur agya huee thi ki ise shighr takshashila ke shasak ke pas pahunchao.

maharaj ne shasak ki or dekha. usane hath jodakar kaha-maharaj, yahi agya-patr lekar gaya tha.

maharaj ne gambhir hokar amaty se kaha-tishyarakshita ko bulao.

mahamaty ne kuchh bolane ki cheshta ki, kintu maharaj ke bhrikutibhng ne unhen bolane se nirast kiya; ab vah svayn uthe aur chale.

bhag 7

mahadevi tishyarakshita rajasabha men upasthit hueen. ashok ne gambhir svar se poochha-yah tumhari lekhani se likha gaya hai? kya us din tumane isi kukarm ke liye rajamudra chhipa li thi? kya kunal ke bade-bade sundar netron ne hi tumhen ankhen nikalavane ki agya dene ke liye vivash kiya tha? avashy tumhara hi yah kukarm hai. astu, tumhari-aisi stri ko prithvi ke oopar nahin, kintu bhitar rahana chahiye.

sab log kanp uthe. kunal ne age badh ghutane tek diye aur kaha-kshama.

ashok ne gambhir svar se kaha-nahin.

tishyarakshita unhin purushon ke sath gayi, jo log use jivit samadhi denevale the. mahamaty ne rajakumar kunal ko asan par baithaya aur dharmarakshita mahal men gayi.

mahamaty ne ek patr aur angoothi maharaj ko di. yah paundravardhan ke shasak ka patr tatha vitashok ki angoothi thi.

patr-path karake aur mudra ko dekhakar vahi kathor ashok vihval ho gaye, or avasann hokar sinhasan par gir pade.

usi din se kathor ashok ne hatya ki agya band kar di, sthan-sthan par jivahinsa n karane ki agya pattharon par khudava di gayi.

kuchh hi kal ke bad maharaj ashok ne udvign chitt ko shant karane ke liye bhagavan buddh ke prasiddh sthanon ko dekhane ke lie dharm-yatra ki.

tika tippani aur sndarbh


bahari kadiyan

snbndhit lekh

varnamala kramanusar lekh khoj

a   a    i    ee    u    oo    e    ai    o   au    an    k   kh    g    gh    n    ch    chh    j    jh    n    t    th    d   dh    n    t    th    d    dh    n    p    ph    b    bh    m    y    r    l    v    sh    sh    s    h    ksh    tr    gy    ri    ri    aau    shr   aah