घासवाली -प्रेमचंद  हिन्दी देवनागरी में पढ़ें।

Icon-edit.gif is lekh ka punarikshan evn sampadan hona avashyak hai. ap isamen sahayata kar sakate hain. "sujhav"

muliya hari-hari ghas ka gattha lekar ayi, to usaka gehuan rng kuchh tamatamaya hua tha aur badi-badi mad-bhari ankho men shnka samaee huee thi. mahavir ne usaka tamatamaya hua chehara dekhakar poochha- kya hai muliya, aj kaisa ji hai.

muliya ne kuchh javab n diya- usaki ankhen dabadaba gayin!

mahavir ne samip akar poochha- kya hua hai, batati kyon nahin? kisi ne kuchh kaha hai, amman ne danta hai, kyon itani udas hai?

muliya ne sisakakar kaha- kuchh nahin, hua kya hai, achchhi to hoon?

mahavir ne muliya ko sir se panv tak dekhakar kaha- chupachap royegi, batayegi nahin?

muliya ne bat talakar kaha- koee bat bhi ho, kya bataoon.

muliya is oosar men gulab ka phool thi. gehuan rng tha, hiran ki-si ankhen, niche khincha hua chibuk, kapolon par halaki lalima, badi-badi nukili palaken, ankho men ek vichitr ardrata, jisamen ek spasht vedana, ek mook vyatha jhalakati rahati thi. maloom nahin, chamaron ke is ghar men vah apsara kahan se a gayi thi. kya usaka komal phool-sa gat is yogy tha ki sar par ghas ki tokari rakhakar bechane jati? us ganv men bhi aise log maujood the, jo usake talave ke niche ankhen bichhate the, usaki ek chitavan ke lie tarasate the, jinase agar vah ek shabd bhi bolati, to nihal ho jate; lekin use aye sal-bhar se adhik ho gaya, kisi ne use yuvakon ki taraph takate ya baten karate nahin dekha. vah ghas liye nikalati, to aisa maloom hota, mano usha ka prakash, sunahare avaran men rnjit, apani chhata bikherata jata ho. koee gajalen gata, koee chhati par hath rakhata; par muliya nichi ankh kiye apani rah chali jati. log hairan hokar kahate- itana abhiman! mahavir men aise kya surakhab ke par lage hain, aisa achchha javan bhi to nahin, n jane yah kaise usake sath rahati hai!

magar aj aisi bat ho gayi, jo is jati ki aur yuvatiyon ke lie chahe gupt sndesh hoti, muliya ke lie hriday ka shool thi. prabhat ka samay tha, pavan am ki baur ki sugndhi se matavala ho raha tha, akash prithvi par sone ki varsha kar raha tha. muliya sir par jhaua rakkhe ghas chhilane chali, to usaka gehuan rng prabhat ki sunahari kiranon se kundan ki tarah damak utha. ekaek yuvak chainasinh samane se ata hua dikhaee diya. muliya ne chaha ki katarakar nikal jay; magar chainasinh ne usaka hath pakad liya aur bola- muliya, tujhe kya mujh par jara bhi daya nahin ati?

muliya ka vah phool-sa khila hua chehara jvala ki tarah dahak utha. vah jara bhi nahin dari, jara bhi n jhijhaki, jhaua zamin par gira diya, aur boli- mujhe chhod do, nahin main chillati hoon.

chainasinh ko aj jivan men ek naya anubhav hua. nichi jaton men roop-madhury ka isake siva aur kam hi kya hai ki vah oonchi jatavalon ka khilauna bane. aise kitane hi mark usane jite the; par aj muliya ke chehare ka vah rng, usaka vah krodh, vah abhiman dekhakar usake chhakke chhoot gaye. usane lajjit hokar usaka hath chhod diya. muliya veg se age badh gayi. sngharsh ki garami men chot ki vyatha nahin hoti, pichhe se tis hone lagati hai. muliya jab kuchh door nikal gayi, to krodh aur bhay tatha apani bekasi ko anubhav karake usaki ankho men ansoo bhar aye. usane kuchh der jabt kiya, phir sisak-sisak kar rone lagi. agar vah itani garib n hoti, to kisi ki majal thi ki is tarah usaka apaman karata! vah roti jati thi aur ghas chhilati jati thi. mahavir ka krodh vah janati thi. agar usase kah de, to vah is thakur ke khoon ka pyasa ho jayaga. phir n jane kya ho! is khayal se usake roen khade ho gaye. isilie usane mahavir ke prashnon ka koee uttar n diya.

2

doosare din muliya ghas ke lie n gayi. sas ne poochha- too kyon nahin jati? aur sab to chali gayin?

muliya ne sir jhukakar kaha- main akeli n jaoongi.

sas ne bigadakar kaha- akele kya tujhe bagh utha le jayaga?

muliya ne aur bhi sir jhuka liya aur dabi huee avaz se boli- sab mujhe chhedate hain.

sas ne danta- n too auron ke sath jayagi, n akeli jayagi, to phir jayagi kaise! vah saph-saph kyon nahin kahati ki main n jaoongi. to yahan mere ghar men rani ban ke nibah n hoga. kisi ko cham nahin pyara hota, kam pyara hota hai. too badi sundar hai, to teri sundarata lekar chatoon? utha jhaba aur ghas la!

dvar par nim ke darakht ke saye men mahavir khada ghode ko mal raha tha. usane muliya ko roni soorat banaye jate dekha; par kuchh bol n saka.usaka bas chalata to muliya ko kaleje men bitha leta, ankho men chhipa leta; lekin ghode ka pet bharana to zaroori tha. ghas mol lekar khilaye, to barah ane roj se kam n pade. aisi mazadoori hi kaun hoti hai. mushkil se dedh-do rupaye milate hain, vah bhi kabhi mile, kabhi n mile. jab se yah satyanashi lariyan chalane lagi hain; ekkevalon ki badhiya baith gayi hai. koee sent bhi nahin poochhata. mahajan se dedh-sau rupaye udhar lekar ekka aur ghoda kharida tha; magar lariyon ke age ekke ko kaun poochhata hai. mahajan ka sood bhi to n pahunch sakata tha, mool ka kahana hi kya! oopari man se bola- n man ho, to rahane do, dekhi jayagi.

is dilajoee se muliya nihal ho gayi. boli- ghoda khayega kya?

aj usane kal ka rasta chhod diya aur kheton ki medon se hoti huee chali. bar-bar satark ankho se idhar-udhar takati jati thi. donon taraph ookh ke khet khade the. jara bhi khadakhadahat hoti, usaka ji sann ho jata kahin koee ookh men chhipa n baitha ho. magar koee nayi bat n huee. ookh ke khet nikal gaye, amon ka bag nikal gaya; sinche hue khet najar ane lage. door ke kuen par pur chal raha tha. kheton ki medon par hari-hari ghas jami huee thi. muliya ka ji lalachaya. yahan adha ghnte men jitani ghas chhil sakati hai, sookhe maidan men dopahar tak n chhil sakegi! yahan dekhata hi kaun hai. koee chillayega, to chali jaoongi. vah baithakar ghas chhilane lagi aur ek ghnte men usaka jhaba adhe se zyada bhar gaya. vah apane kam men itani tanmay thi ki use chainasinh ke ane ki khabar hi n huee. ekaek usane ahat pakar sir uthaya, to chainasinh ko khada dekha.

muliya ki chhati dhakh se ho gayi. ji men aya bhag jay, jhaba ulat de aur khali jhaba lekar chali jay; par chainasinh ne kee gaj ke phasale se hi rukakar kaha- dar mat, dar mat, bhagavan janata hai! main tujhase kuchh n boloonga. jitani ghas chahe chhil le, mera hi khet hai.

muliya ke hath sunn ho gaye, khurapi hath men jam-si gayi, ghas najar hi n ati thi. ji chahata tha; zamin phat jay aur main sama jaoon. zamin ankho ke samane tairane lagi.

chainasinh ne ashvasan diya- chhilati kyon nahin? main tumase kuchh kahata thode hi hoon. yahin roj chali aya kar, main chhil diya karoonga.

muliya chitralikhit-si baithi rahi.

chainasinh ne ek qadam age badhaya aur bola- too mujhase itana darati kyon hai! kya too samajhati hai, main aj bhi tujhe satane aya hoon? eeshvar janata hai, kal bhi tujhe satane ke lie mainne tera hath nahin pakada tha. tujhe dekhakar ap-hi-ap hath badh gaye. mujhe kuchh sudh hi n rahi. too chali gayi, to main vahin baithakar ghnton rota raha. ji men ata tha, hath kat daloon. kabhi ji chahata tha, zahar kha loon. tabhi se tujhe dhoondh raha hoon aj too is raste se chali ayi. main sara har chhanata hua yahan aya hoon. ab jo saza tere ji men ave, de de. agar too mera sir bhi kat le, to gardan n hilaoonga. main shohada tha, luchcha tha, lekin jab se tujhe dekha hai, mere man se sari khot mit gayi hai. ab to yahi ji men ata hai ki tera kutta hota aur tere pichhe-pichhe chalata, tera ghoda hota, tab to too apane hathon se mere samane ghas dalati. kisi tarah yah chola tere kam ave, mere man ki yah sabase badi lalasa hai. meri javani kam n ave, agar main kisi khot se ye baten kar raha hoon. bada bhagavan tha mahavir, jo aisi devi use mili.

muliya chupachap sunati rahi, phir nicha sir karake bholepan se boli- to tum mujhe kya karane ko kahate ho?

chainasinh aur samip akar bola- bas, teri daya chahata hoon.

muliya ne sir uthakar usaki or dekha. usaki lajja n jane kahan gayab ho gayi. chubhate hue shabdon men boli- tumase ek bat kahoon, bura to n manoge? tumhara byah ho gaya hai ya nahin?

chainasinh ne dabi jaban se kaha- byah to ho gaya, lekin byah kya hai, khilavad hai.

muliya ke hothon par avahelana ki musakarahat jhalak padi, boli- phir bhi agar mera adami tumhari aurat se isi tarah baten karata, to tumhen kaisa lagata? tum usaki gardan katane par taiyar ho jate ki nahin? bolo! kya samajhate ho ki mahavir chamar hai to usaki deh men lahoo nahin hai, use lajja nahin hai, apane maryada ka vichar nahin hai? mera roop-rng tumhen bhata hai. kya ghat ke kinare mujhase kahin sundar auraten nahin ghooma karatin? main unake talavon ki barabari bhi nahin kar sakati. tum usamen se kisi se kyon nahin daya mangate! kya unake pas daya nahin hai? magar vahan tum n jaoge; kyonki vahan jate tumhari chhati dahalati hai. mujhase daya mangate ho, isalie n ki main chamarin hoon, nich jati hoon aur nich jati ki aurat jara-si ghudaki-dhamaki va jara-si lalach se tumhari mutthi men a jayagi. kitana sasta sauda hai. thakur ho n, aisa sasta sauda kyon chhodane lage?

chainasinh lajjit hokar bola- moola, yah bat nahin. main sach kahata hoon, isamen oonch-nich ki bat nahin hai. sab adami barabar hain. main to tere charanon par sir rakhane ko taiyar hoon.

muliya- isilie n ki janate ho, main kuchh kar nahin sakati. jakar kisi khatarani ke charanon par sir rakkho, to maloom ho ki charanon par sir rakhane ka kya phal milata hai. phir yah sir tumhari gardan par n rahega.

chainasinh mare sharm ke zamin men gada jata tha. usaka munh aisa sookh gaya tha, mano mahinon ki bimari se utha ho. munh se bat n nikalati thi. muliya itani vakh-patu hai, isaka use guman bhi n tha.

muliya phir boli- main bhi roj bazar jati hoon. bade-bade gharon ka hal janati hoon. mujhe kisi bade ghar ka nam bata do, jisamen koee saees, koee kochavan, koee kahar, koee pnda, koee maharaj n ghusa baitha ho? yah sab bade gharon ki lila hai. aur vah auraten jo kuchh karati hain, thik karati hain! unake gharavale bhi to chamarinon aur kaharinon par jan dete phirate hain. lena-dena barabar ho jata hai. bechare garib adamiyon ke lie yah baten kahan? mere adami ke lie snsar men jo kuchh hoon, main hoon. vah kisi doosari mihariya ki or ankh uthakar bhi nahin dekhata. snyog ki bat hai ki main tanik sundar hoon, lekin main kali-kalooti bhi hoti, tab bhi vah mujhe isi tarah rakhata. isaka mujhe vishvas hai. main chamarin hokar bhi itani nich nahin hoon ki vishvas ka badala khot se doon. han, vah apane man ki karane lage, meri chhati par moong dalane lage, to main bhi usaki chhati par moong daloongi. tum mere roop hi ke divane ho n! aj mujhe mata nikal ayen, kani ho jaoon, to meri or takoge bhi nahin. bolo, jhooth kahati hoon?

chainasinh inakar n kar saka.

muliya ne usi garv se bhare hue svar men kaha- lekin meri ek nahin, donon ankhen phoot jayen, tab bhi vah mujhe isi tarah rakkhega. mujhe uthavega, baithavega, khilavega. tum chahate ho, main aise adami ke sath kapat karoon? jao, ab mujhe kabhi n chhedana, nahin achchha n hoga.

3

javani josh hai, bal hai, daya hai, sahas hai, atm-vishvas hai, gaurav hai aur sab kuchh jo jivan ko pavitr, ujjval aur poorn bana deta hai. javani ka nasha ghamnd hai, nirdayata hai, svarth hai, shekhi hai, vishay-vasana hai, katuta hai aur vah sab kuchh jo jivan ko pashuta, vikar aur patan ki or le jata hai. chainasinh par javani ka nasha tha. muliya ke shital chhinton ne nasha utar diya. jaise ubalati huee chashani men pani ke chhinte pad jane se phen mit jata hai, mail nikal jata hai aur nirmal, shuddh ras nikal ata hai. javani ka nasha jata raha, keval javani rah gayi. kamini ke shabd jitani asani se din aur eeman ko garat kar sakate hain, utani hi asani se unaka uddhar bhi kar sakate hain.

chainasinh us din se doosara hi adami ho gaya. gussa usaki nak par rahata tha, bat-bat par mazadooron ko galiyan dena, dantana aur pitana usaki adat thi. asami usase thar-thar kanpate the. mazadoor use ate dekhakar apane kam men chust ho jate the; par jyon hi usane idhar pith pheri aur unhonne chilam pina shuroo kiya. sab dil men usase jalate the, use galiyan dete the. magar us din se chainasinh itana dayalu, itana gnbhir, itana sahanashil ho gaya ki logon ko ashchary hota tha.

kee din gujar gaye the. ek din sndhya samay chainasinh khet dekhane gaya. pur chal raha tha. usane dekha ki ek jagah nali toot gayi hai, aur sara pani baha chala jata hai. kyariyon men pani bilakul nahin pahunchata, magar kyari banane vali budhiya chupachap baithi hai. use isaki jara bhi fikr nahin hai ki pani kyon nahin ata. pahale yah dasha dekhakar chainasinh ape se bahar ho jata. us aurat ki us din majoori kat leta aur pur chalanevalon ko ghudakiyan jamata, par aj use krodh nahin aya. usane mitti lekar nali bandh di aur khet men jakar budhiya se bola- too yahan baithi hai aur pani sab baha ja raha hai.

budhiya ghabadakar boli- abhi khul gayi hogi. raja! main abhi jakar bnd kiye deti hoon.

yah kahati huee vah tharathar kanpane lagi. chainasinh ne usaki dilajoee karate hue kaha- bhag mat, bhag mat. mainne nali bnd kar di. budhoo kee din se nahin dikhaee diye, kahin kam par jate hain ki nahin?

budhiya gadgad hokar boli- ajakal to khali hi baithe hain bhaiya, kahin kam nahin lagata.

chainasinh ne namr bhav se kaha- to hamare yahan laga de. thoda-sa san rakha hai, use kat den.

yah kahata hua vah kuen ki or chala gaya. yahan char pur chal rahe the; par is vakt do hnkave ber khane gaye the. chainasinh ko dekhate hi majooron ke hosh ud gaye. thakur ne poochha, do adami kahan gaye, to kya javab denge? sab-ke-sab dante jayenge. bechare dil men sahame ja rahe the. chainasinh ne poochha- vah donon kahan chale gaye?

kisi ke munh se avaz n nikali. sahasa samane se donon majoor dhoti ke ek kone men ber bhare ate dikhaee die. khush-khush bat karate chale a rahe the. chainasinh par nigah padi, to donon ke pran sookh gaye. panv man-man bhar ke ho gaye. ab n ate banata hai, n jate. donon samajh gaye ki aj dant padi, shayad majoori bhi kat jay. chal dhimi pad gayi. itane men chainasinh ne pukara badh ao, badh ao, kaise ber hain, lao jara mujhe bhi do, mere hi ped ke hain n?

donon aur bhi saham uthe. aj thakur jita n chhodega. kaisa mitha-mithakar bol raha hai. utani hi bhigo-bhigokar lagayega. bechare aur bhi sikud gaye.

chainasinh ne phir kaha- jaldi se ao ji, pakki-pakki sab main le loonga. jara ek adami lapakakar ghar se thoda-sa namak to le lo! (baki donon majooron se) tum bhi donon a jao, us ped ke ber mithe hote hain. ber kha le, kam to karana hi hai.

ab donon bhagodon ko kuchh dharas hua. sabhi ne jakar sab ber chainasinh ke age dal die aur pakke-pakke chhantakar use dene lage. ek adami namak lane dauda. adha ghnte tak charon pur bnd rahe. jab sab ber ud gaye aur thakur chalane lage, to donon aparadhiyon ne hath jodakar kaha- bhaiyaji, aj jan bakasi ho jay, badi bhookh lagi thi, nahin to kabhi n jate.

chainasinh ne namrata se kaha- to isamen buraee kya huee? mainne bhi to ber khaye. ek-adha ghnte ka haraj hua yahi n? tum chahoge, to ghnte bhar ka kam adha ghnte men kar doge. n chahoge, din-bhar men bhi ghnte-bhar ka kam n hoga.

chainasinh chala gaya, to charon baten karane lage.

ek ne kaha- malik is tarah rahe, to kam karane men ji lagata hai. yah nahin ki haradam chhati par savar.

doosara- mainne to samajha, aj kachcha hi kha jayenge.

tisara- kee din se dekhata hoon, mizaj naram ho gaya hai.

chautha- sanjh ko poori majoori mile to kahana.

pahala- tum to ho gobar-ganes. adami ka rukh nahin pahachanate.

doosara- ab khoob dil lagakar kam karenge.

tisara- aur kya! jab unhonne hamare oopar chhod diya, to hamara bhi dharam hai ki koee kasar n chhoden.

chautha- mujhe to bhaiya, thakur par ab bhi vishvas nahin ata.

4

ek din chainasinh ko kisi kam se kachahari jana tha. panch mil ka saphar tha. yon to vah barabar apane ghode par jaya karata tha; par aj dhoop badi tej ho rahi thi, socha ekke par chala chaloon. mahavir ko kahala bheja mujhe lete jana. koee nau baje mahavir ne pukara. chainasinh taiyar baitha tha. chatapat ekke par baith gaya. magar ghoda itana dubala ho raha tha, ekke ki gaddi itani maili aur phati huee, sara saman itana raddi ki chainasinh ko us par baithate sharm aee. poochha yah saman kyon bigada hua hai mahavir? tumhara ghoda to itana dubala kabhi n tha; kya ajakal savariyan kam hain kya? mahavir ne kaha, nahin malik, savariyan kahe nahin hai; magar lariyon ke samane ekke ko kaun poochhata hai. kahan do-dhaee-tin ki majoori karake ghar lautata tha, kahan ab bis ane paise bhi nahin milate? kya janavar ko khilaoon kya ap khaoon? badi vipatti men pada hoon. sochata hoon ekka-ghoda bech-bachakar ap logon ki majoori kar loon, par koee gahak nahin lagata. zyada nahin to barah ane to ghode hi ko chahie, ghas oopar se. jab apana hi pet nahin chalata, to janavar ko kaun poochhe. chainasinh ne usake phate hue kurate ki or dekhakar kaha, do-char bighe kheti kyon nahin kar lete?

mahavir sir jhukakar bola- kheti ke lie bada paurukh chahie malik! mainne to yahi socha hai ki koee gahak lag jay, to ekke ko aune-paune nikal doon, phir ghas chhilakar bazar le jaya karoon. ajakal sas-patohoo donon chhilati hain. tab jakar das-barah ane paise nasib hote hain.

chainasinh ne poochha- to budhiya bazar jati hogi?

mahavir lajata hua bola- nahin bhaiya, vah itani door kahan chal sakati hai. gharavali chali jati hai. dopahar tak ghas chhilati hai, tisare pahar bazar jati hai. vahan se ghadi rat gaye lautati hai. halakan ho jati hai bhaiya, magar kya karoon, takadir se kya jor.

chainasinh kachahari pahunch gaye aur mahavir savariyon ki toh men idhar-udhar ikke ko ghumata hua shahar ki taraph chala gaya. chainasinh ne use panch baje ane ko kah diya.

koee char baje chainasinh kachahari se phurasat pakar bahar nikale. hate men pan ki dukan thi, jara aur age badhakar ek ghana baragad ka ped tha, usaki chhanh men bison hi tange; ekke, phitanen khadi thin. ghode khol die gaye the. vakilon, mukhtaron aur aphasaron ki savariyan yahin khadi rahati thin. chainasinh ne pani piya, pan khaya aur sochane laga koee lari mil jay, to jara shahar chala jaoon ki usaki nigah ek ghasavali par pad gayi. sir par ghas ka jhaba rakkhe saeeson se mol-bhav kar rahi thi. chainasinh ka hriday uchhal pada yah to muliya hai! bani-thani, ek gulabi sadi pahane kochavanon se mol-tol kar rahi thi. kee kochavan jama ho gaye the. koee usase dillagi karata tha, koee ghoorata tha, koee hnsata tha.

ek kale-kaloote kochavan ne kaha- moola, ghas to udake adhik se adhik chh: ane ki hai.

muliya ne unmad paida karane vali ankho se dekhakar kaha- chh: ane par lena hai, to samane ghasiyarinen baithi hain, chale jao, do-char paise kam men pa jaoge, meri ghas to barah ane men hi jayagi.

ek adhed kochavan ne phitan ke oopar se kaha- tera jamana hai, barah ane nahin ek rupaya mang. lenevale jhakh marenge aur lenge. nikalane de vakilon ko, ab der nahin hai.

ek tangevale ne, jo gulabi pagadi bandhe hue tha, bola- budhoo ke munh men pani bhar aya, ab muliya kahe ko kisi ki or dekhegi!

chainasinh ko aisa krodh a raha tha ki in dushton ko joote se pite. sab-ke-sab kaise usaki or takataki lagaye tak rahe hain, ankho se pi jayenge. aur muliya bhi yahan kitani khush hai. n lajati hai, n jhijhakati hai, n dabati hai. kaisa musakira-musakirakar, rasili ankho se dekh-dekhakar, sir ka anchal khisaka- khisakakar, munh mod-modakar baten kar rahi hai. vahi muliya, jo sherani ki tarah tadap uthi thi.

itane men char baje. amale aur vakil-mukhtaron ka ek mela-sa nikal pada. amale lariyon par daude. vakil-mukhtar in savariyon ki or chale. kochavanon ne bhi chatapat ghode jote. kee mahashayon ne muliya ko rasik netron se dekha aur apani-apani gadiyon par ja baithe.

ekaek muliya ghas ka jhaba liye us phitan ke pichhe daudi. phitan men ek angreji phaishan ke javan vakil sahab baithe the. unhonne pavadan par ghas rakhava li, jeb se kuchh nikalakar muliya ko diya. muliya muskaraee, donon men kuchh baten bhi hueen, jo chainasinh n sun sake.

ek kshan men muliya prasann-mukh ghar ki or chali. chainasinh panavale ki dukan par vismriti ki dasha men khada raha. panavale ne dukan badhaee, kapade pahine aur kebin ka dvar bnd karake niche utara to chainasinh ki samadhi tooti. poochha kya dukan bnd kar di?

panavale ne sahanubhooti dikhakar kaha- isaki dava karo thakur sahab, yah bimari achchhi nahin hai!

chainasinh ne chakit hokar poochha- kaisi bimari?

panavala bola- kaisi bimari! adha ghnte se yahan khade ho jaise koee murada khada ho. sari kachahari khali ho gayi, sab dukanen bnd ho gayin, mehatar tak jhadoo lagakar chal diye; tumhen kuchh khabar huee? yah buri bimari hai, jaldi dava kar dalo.

chainasinh ne chhadi snbhali aur phatak ki or chala ki mahavir ka ekka samane se ata dikhaee diya.

5

kuchh door ekka nikal gaya, to chainasinh ne poochha- aj kitane paise kamaye mahavir?

mahavir ne hnsakar kaha- aj to malik, din bhar khada hi rah gaya. kisi ne begar men bhi n pakada. oopar se char paise ki bidiyan pi gaya.

chainasinh ne jara der ke bad kaha- meri ek salah hai. tum mujhase ek rupaya roj liya karo. bas, jab main bulaoon to ekka lekar chale aya karo. tab to tumhari gharavali ko ghas lekar bazar n jana padega. bolo mnjoor hai?

mahavir ne sajal ankho se dekhakar kaha- malik, ap hi ka to khata hoon. apaki paraja hoon. jab maraji ho, pakad mngavaie. apase rupaye…

chainasinh ne bat katakar kaha- nahin, main tumase begar nahin lena chahata. tum mujhase ek rupaya roj le jaya karo. ghas lekar gharavali ko bazar mat bheja karo. tumhari abaroo meri abaroo hai. aur bhi rupaye-paise ka jab kam lage, bekhatake chale aya karo. han, dekho, muliya se is bat ki bhoolakar bhi charcha n karana. kya fayada!

kee dinon ke bad sndhya samay muliya chainasinh se mili. chainasinh asamiyon se malagujari vasool karake ghar ki or lapaka ja raha tha ki usi jagah jahan usane muliya ki banh pakadi thi, muliya ki avaz kanon men ayi. usane thithakakar pichhe dekha, to muliya daudi a rahi thi. bola- kya hai moola! kyon daudati ho, main to khada hoon?

muliya ne hanphate hue kaha- kee din se tumase milana chahati thi. aj tumhen ate dekha, to daudi. ab main ghas bechane nahin jati.

chainasinh ne kaha- bahut achchhi bat hai.

'kya tumane kabhi mujhe ghas bechate dekha hai?’

'han, ek din dekha tha. kya mahavir ne tujhase sab kah dala? mainne to mana kar diya tha.'

'vah mujhase koee bat nahin chhipata.'

donon ek kshan chup khade rahe. kisi ko koee bat n soojhati thi. ekaek muliya ne muskarakar kaha- yahan tumane meri banh pakadi thi.

chainasinh ne lajjit hokar kaha- usako bhool jao moola. mujh par jane kaun bhoot savar tha.

muliya gadgadh‍ knth se boli- use kyon bhool jaoon. usi banh gahe ki laj to nibha rahe ho. garibi adami se jo chahe karave. tumane mujhe bacha liya. phir donon chup ho gaye.

jara der ke bad muliya ne phir kaha- tumane samajha hoga, main hnsane-bolane men magan ho rahi thi?

chainasinh ne balapoorvak kaha- nahin muliya, mainne ek kshan ke lie bhi nahin samajha.

muliya muskarakar boli- mujhe tumase yahi asha thi, aur hai.

pavan sinche hue kheton men vishram karane ja raha tha, soory nisha ki god men vishram karane ja raha tha, aur us malin prakash men chainasinh muliya ki vilin hoti huee rekha ko khada dekh raha tha!

tika tippani aur sndarbh

bahari kadiyan

snbndhit lekh

varnamala kramanusar lekh khoj

a   a    i    ee    u    oo    e    ai    o   au    an    k   kh    g    gh    n    ch    chh    j    jh    n    t    th    d   dh    n    t    th    d    dh    n    p    ph    b    bh    m    y    r    l    v    sh    sh    s    h    ksh    tr    gy    ri    ri    aau    shr   aah