मर्यादा की वेदी- प्रेमचंद  हिन्दी देवनागरी में पढ़ें।

Icon-edit.gif is lekh ka punarikshan evn sampadan hona avashyak hai. ap isamen sahayata kar sakate hain. "sujhav"

yah vah samay tha jab chittaud men mridubhashini mira pyari atmaon ko eeshvar-prem ke pyale pilati thi. ranachhod ji ke mndir men jab bhakti se vihval ho kar vah apane madhur svaron men apane piyooshapoorit padon ko gati to shrotagan premanurag se unmatt ho jate. pratidin yah svargiy annd uthane ke lie sare chittaud ke log aise utsuk ho kar daudate jaise din bhar ki pyasi gayen door se kisi sarovar ko dekh kar usaki or daudati hain. is prem-sudha-sagar se keval chittaudavasiyon hi ki tripti n hoti thi balki samast rajapootana ki marubhoomi plavit ho jati thi.

ek bar aisa snyog hua ki jhalavad ke ravasahab aur mndar rajy ke kumar donon hi lav-lashkar ke sath chittaud aye. ravasahab ke sath rajakumari prabha bhi thi jisake roop aur gun ki door-door tak charcha thi. yahin ranachhod ji ke mndir men donon ki ankhen milin. prem ne ban chalaya.

rajakumar sare din udasin bhav se shahar ki galiyon men ghooma karata. rajakumari virah se vyathit apane mahal ke jharokhon se jhanka karati. donon vyakul ho kar sndhya samay mndir men ate aur yahan chndr ko dekh kar kumudini khil jati.

prem-pravin mira ne kee bar in donon premiyon ko satrishn netron se paraspar dekhate hue pa kar unake man ke bhavon ko tad liya. ek din kirttan ke pashchath jab jhalavad ke ravasahab chalane lage to usane mndar ke rajakumar ko bula kar unake samane khada kar diya aur kaha-ravasahab main prabha ke lie var layi hoon ap ise svikar kijie.

prabha lajja se gad-si gayi. rajakumar ke gun-shil par ravasahab pahale hi se mohit ho rahe the unhonne turnt use chhati se laga liya.

usi avasar par chittaud ke rana bhojaraj ji mndir men aye. unhonne prabha ka mukh-chndr dekha. unaki chhati par sanp lotane laga.

2

jhalavad men badi dhoom thi. rajakumari prabha ka aj vivah hoga. mndar se barat ayegi. mehamanon ki seva-samman ki taiyariyan ho rahi thin. dookanen saji huee thin. naubatakhane amodalap se goonjate the. sadakon par sugndhi chhidaki jati thi attalikaen pushp-lataon se shobhayaman thin. par jisake lie ye sab taiyariyan ho rahi thin vah apani vatika ke ek vriksh ke niche udas baithi huee ro rahi thi.

ranivas men dominiyan anndotsav ke git ga rahi thin. kahin sundariyon ke hav-bhav the kahin abhooshanon ki chamak-damak kahin has-parihas ki bahar. nain bat-bat par tej hoti thi. malin garv se phooli n samati thi. dhobin ankhen dikhati thi. kumharin matake ke sadrish phooli huee thi. mndap ke niche purohit ji bat-bat par suvarn-mudraon ke lie thunakate the. rani sir ke bal khole bhookhi-pyasi charon or daudati thi. sabaki bauchharen sahati thi aur apane bhagy ko sarahati thi. dil khol kar hire-javahir luta rahi thi. aj prabha ka vivah hai. bade bhagy se aisi baten sunane men ati hain. sabake sab apani-apani dhun men mast hain. kisi ko prabha ki fikr nahin hai jo vriksh ke niche akeli baithi ro rahi hai.

ek ramani ne a kar nain se kaha-bahut badh-badh kar baten n kar kuchh rajakumari ka bhi dhyan hai chal unake bal goonth.

nain ne danton tale jibh dabayi. donon prabha ko dhoondhati huee bag men pahunchin. prabha ne unhen dekhate hi ansoo ponchh dale. nain motiyon se mang bharane lagi aur prabha sir nicha kiye ankhon se moti barasane lagi.

ramani ne sajal netr ho kar kaha-bahin dil itana chhota mat karo. munhamangi murad pa kar itani udas kyon hoti ho

prabha ne saheli ki or dekh kar kaha-bahin jane kyon dil baitha jata hai. saheli ne chhed kar kaha-piya-milan ki bekali hai !

prabha udasin bhav se boli-koee mere man men baitha kah raha hai ki ab unase mulakat n hogi.

saheli usake kesh snvar kar boli-jaise ushakal se pahale kuchh andhera ho jata hai usi prakar milap ke pahale premiyon ka man adhir ho jata hai.

prabha boli-nahin bahin yah bat nahin. mujhe shakun achchhe nahin dikhayi dete. aj din bhar meri ankh phadakati rahi. rat ko mainne bure svapn dekhe hain. mujhe shnka hoti hai ki aj avashy koee n koee vighn padanevala hai. tum raja bhojaraj ko janati ho n

sndhya ho gayi. akash par taron ke dipak jale. jhalavad men boodhe-javan sabhi log barat ki agavani ke lie taiyar hue. maradon ne pagen snvarin shastr saje. yuvatiyan shrringar kar gati-bajati ranivas ki or chalin. hajaron striyan chhat par baithi barat ki rah dekh rahi thin.

achanak shor macha ki barat a gayi. log snbhal baithe nagadon par choten padane lagin salamiyan dagane lagin. javanon ne ghodon ko ed lagayi. ek kshan men savaron ki ek sena rajabhavan ke samane a kar khadi ho gayi. logon ko dekh kar bada ashchary hua kyonki yah mndar ki barat nahin thi balki rana bhojaraj ki sena thi.

jhalavadavale abhi vismit khade hi the kuchh nishchay n kar sake the ki kya karana chahie. itane men chittaudavalon ne rajabhavan ko gher liya. tab jhalavadi bhi sachet hue. snbhal kar talavaren khinch lin aur akramanakariyon par toot pade. raja mahal men ghus gaya. ranivas men bhagadad mach gayi.

prabha solaho shrringar kiye saheliyon ke sath baithi thi. yah halachal dekhakar ghabadayi. itane men ravasahab hanphate hue aye aur bole-beti prabha rana bhojaraj ne hamare mahal ko gher liya hai. tum chatapat oopar chali jao aur dvar ko bnd kar lo. agar ham kshatriy hain to ek chittaudi bhi yahan se jita n jayaga.

ravasahab bat bhi poori n karane paye the ki rana kee viron ke sath a pahunche aur bole-chittaudavale to sir katane ke lie aye hi hain. par yadi ve rajapoot hain to rajakumari ko le kar hi jayenge. vriddh ravasahab ki ankhon se jvala nikalane lagi. ve talavar khinch kar rana par jhapate. unhonne var bacha liya aur prabha se kaha-rajakumari hamare sath chalogi

prabha sir jhukaye rana ke samane a kar boli-han chaloongi.

ravasahab ko kee adamiyon ne pakad liya tha. ve tadap kar bole-prabha too rajapoot ki kanya hai

prabha ki ankhen sajal ho gayin. boli-rana bhi to rajapooton ke kulatilak hain. ravasahab ne krodh men a kar kaha-nirlajja !

katar ke niche pada hua balidan ka pashu jaisi din drishti se dekhata hai usi bhanti prabha ne ravasahab ki or dekh kar kaha-jis jhalavad ki god men pali hoon kya use rakt se rngava doon

ravasahab ne krodh se kanp kar kaha-kshatriyon ko rakt itana pyara nahin hota. maryada par pran dena unaka dharm hai !

tab prabha ki ankhen lal ho gayin. chehara tamatamane laga.

boli-rajapoot-kanya apane satitv ki raksha ap kar sakati hai. isake lie rudhir pravah ki avashyakata nahin.

pal bhar men rana ne prabha ko god men utha liya. bijali ki bhanti jhapat kar bahar nikale. unhonne use ghode par bitha liya ap savar ho gaye aur ghode ko uda diya. any chittaudiyon ne bhi ghodon ki bagen mod din usake sau javan bhoomi par pade tadap rahe the par kisi ne talavar n uthayi thi.

rat ko das baje mndaravale bhi pahunche. magar yah shok-samachar pate hi laut gaye. mndar-kumar nirasha se achet ho gaya. jaise rat ko nadi ka kinara sunasan ho jata hai usi tarah sari rat jhalavad men sannata chhaya raha.

3

chittaud ke rng-mahal men prabha udas baithi samane ke sundar paudhon ki pattiyan gin rahi thi. sndhya ka samay tha. rng-birng ke pakshi vrikshon par baithe kalarav kar rahe the. itane men rana ne kamare men pravesh kiya. prabha uth kar khadi ho gayi.

rana bole-prabha main tumhara aparadhi hoon. main balapoorvak tumhen mata-pita ki god se chhin laya par yadi main tumase kahoon ki yah sab tumhare prem se vivash ho kar mainne kiya to tum man men hnsogi aur kahogi ki yah nirale anoothe dhng ki priti hai par vastav men yahi bat hai. jabase mainne ranachhod ji ke mndir men tumako dekha tab se ek kshan bhi aisa nahin bita ki main tumhari sudhi men vikal n raha hooon. tumhen apanane ka any koee upay hota to main kadapi is pashavik dhng se kam n leta. mainne ravasahab ki seva men barnbar sndeshe bheje par unhonne hamesha meri upeksha ki. ant men jab tumhare vivah ki avadhi a gayi aur mainne dekha ki ek hi din men tum doosare ki prem-patri ho jaogi aur tumhara dhyan karana bhi meri atma ko dooshit karega to lachar hokar mujhe yah aniti karani padi. main manata hoon ki yah sarvatha meri svarthandhata hai. mainne apane prem ke samane tumhare manogat bhavon ko kuchh n samajha par prem svayn ek badhi huee svarthaparata hai jab manushy ko apane priyatam ke sivay aur kuchh nahin soojhata. mujhe poora vishvas tha ki main apane vinit bhav aur prem se tumako apana loonga. prabha pyas se marata hua manushy yadi kisi gadhe men munh dal de to vah dnd ka bhagi nahin hai. main prem ka pyasa hoon. mira meri sahadharmini hai. usaka hriday prem ka agadh sagar hai. usaka ek chulloo bhi mujhe unmatt karane ke lie kafi tha par jis hriday men eeshvar ka vas ho vahan mere lie sthan kahan tum shayad kahogi ki yadi tumhare sir par prem ka bhoot savar tha to kya sare rajapootane men striyan n thin. nissndeh rajapootane men sundarata ka abhav nahin hai aur n chittaudadhipati ki or se vivah ki batachit kisi ke anadar ka karan ho sakati hai par isaka javab tum ap hi ho. isaka dosh tumhare hi oopar hai. rajasthan men ek hi chittaud hai ek hi rana aur ek hi prabha. sambhav hai mere bhagy men premannd bhogana n likha ho. yah main apane karm-lekh ko mitane ka thoda-sa prayatn kar raha hoon parntu bhagy ke adhin baithe rahana purushon ka kam nahin hai. mujhe isamen saphalata hogi ya nahin isaka phaisala tumhare hath hai.

prabha ki ankhen zamin ki taraph thin aur man phudakanevali chidiya ki bhanti idhar-udhar udata phirata tha. vah jhalavad ko marakat se bachane ke lie rana ke sath ayi thi magar rana ke prati usake hriday men krodh ki tarngen uth rahi thin. usane socha tha ki ve yahan ayenge to unhen rajapoot kul-kalnk anyayi durachari duratma kayar kah kar unaka garv choor-choor kar doongi. usako vishvas tha ki yah apaman unase n saha jayaga aur ve mujhe balath apane kaboo men lana chahenge. is antim samay ke lie usane apane hriday ko khoob mazaboot aur apani katar ko khoob tej kar rakha tha. usane nishchay kar liya tha ki isaka ek var un par hoga doosara apane kaleje par aur is prakar yah pap-kand samapt ho jayaga. lekin rana ki namrata unaki karunatmak vivechana aur unake vinit bhav ne prabha ko shant kar diya. ag pani se bujh jati hai. rana kuchh der vahan baithe rahe phir uth kar chale gaye.

4

prabha ko chittaud men rahate do mahine gujar chuke hain. rana usake pas phir n aye. is bich men unake vicharon men kuchh antar ho gaya hai. jhalavad par akraman hone ke pahale mirabaee ko isaki bilakul khabar n thi. rana ne is prastav ko gupt rakha tha. kintu ab mirabaee prayah unhen is duragrah par lajjit kiya karati hai aur dhire-dhire rana ko bhi vishvas hone laga hai ki prabha is tarah kaboo men nahin a sakati. unhonne usake sukh-vilas ki samagri ekatr karane men koee kasar nahin rakh chhodi thi. lekin prabha unaki taraph ankh utha kar bhi nahin dekhati. rana prabha ki laundiyon se nity ka samachar poochha karate hain aur unhen roj vahi nirashapoorn vrittant sunayi deta hai. murajhayi huee kali kisi bhanti nahin khilati. atev unako kabhi-kabhi apane is dussahas par pashchattap hota hai. ve pachhatate hain ki mainne vyarth hi yah anyay kiya. lekin phir prabha ka anupam saundary netron ke samane a jata hai aur vah apane man ko is vichar se samajha lete hain ki ek sagarva sundari ka prem itani jaldi parivartit nahin ho sakata. nissndeh mera mridu vyavahar bhi kabhi n kabhi apana prabhav dikhalayega.

prabha sare din akeli baithi-baithi ukatati aur jhunjhalati thi. usake vinod ke nimitt kee ganevali striyan niyukt thin kintu rag-rng se use aruchi ho gayi. vah pratikshan chintaon men doobi rahati thi.

rana ke namr bhashan ka prabhav ab mit chuka tha aur usaki amanushik vritti ab phir apane yatharth roop men dikhayi dene lagi thi. vakchaturata shantikarak nahin hoti. vah keval niruttar kar deti hai. prabha ko ab apane avakh ho jane par ashchary hota hai. use rana ki baton ke uttar bhi soojhane lage hain. vah kabhi-kabhi unase lad kar apani kismat ka phaisala karane ke lie vikal ho jati hai.

magar ab vad-vivad kis kam ka vah sochati hai ki main ravasahab ki kanya hoon par snsar ki drishti men rana ki rani ho chuki. ab yadi main is kaid se chhoot bhi jaoon to mere lie kahan thikana hai main kaise munh dikhaoongi isase keval mere vnsh ka hi nahin varanh samast rajapoot-jati ka nam doob jayaga. mndar-kumar mere sachche premi hain. magar kya ve mujhe angikar karegen aur yadi ve ninda ki paravah n karake mujhe grahan bhi kar len to unaka mastak sada ke lie nicha ho jayaga aur kabhi n kabhi unaka man meri taraph se phir jayaga. ve mujhe apane kul ka kalnk samajhane lagenge. ya yahan se kisi tarah bhag jaoon lekin bhag kar jaoon kahan bap ke ghar vahan ab meri paith nahin. mndar-kumar ke pas isamen unaka apaman hai aur mera bhi. to kya bhikharini ban jaoon isamen bhi jag-hnsaee hogi aur n jane prabal bhavi kis marg par le jay. ek abala stri ke lie sundarata pranaghatak yntr se kam nahin. eeshvar vah din n aye ki main kshatriy-jati ka kalnk banoon. kshatriy-jati ne maryada ke lie pani ki tarah rakt bahaya hai. unaki hajaron deviyan par-purush ka munh dekhane ke bhay se sookhi lakadi ke saman jal mari hain. eeshvar vah ghadi n aye ki mere karan kisi rajapoot ka sir lajja se nicha ho. nahin main isi kaid men mar jaoongi. rana ke anyay sahoongi jaloongi maroongi par isi ghar men. vivah jisase hona tha ho chuka. hriday men usaki upasana karoongi par knth ke bahar usaka nam n nikaloongi.

ek din jhunjhala kar usane rana ko bula bheja. ve aye. unaka chehara utara tha. ve kuchh chintit-se the. prabha kuchh kahana chahati thi par unaki soorat dekh kar use un par daya a gayi. unhonne use bat karane ka avasar n de kar svayn kahana shuroo kiya.

prabha tumane aj mujhe bulaya hai. yah mera saubhagy hai. tumane meri sudhi to li magar yah mat samajho ki main mridu-vani sunane ki asha le kar aya hoon. nahin main janata hoon jisake lie tumane mujhe bulaya hai. yah lo tumhara aparadhi tumhare samane khada hai. use jo dnd chaho do. mujhe ab tak ane ka sahas n hua. isaka karan yahi dnd-bhay tha. tum kshatrani ho aur kshatraniyan kshama karana nahin janatin. jhalavad men jab tum mere sath ane par svayn udyat ho gayin to mainne usi kshan tumhare jauhar parakh liye. mujhe maloom ho gaya ki tumhara hriday bal aur vishvas se bhara hua hai. use kaboo men lana sahaj nahin. tum nahin janatin ki yah ek mas mainne kis tarah kata hai. tadap-tadap kar mar raha hoon par jis tarah shikari biphari huee sinhani ke sammukh jane se darata hai vahi dasha meri thi. main kee bar aya. yahan tumako udas tyauriyan chadhaye baithe dekha. mujhe andar pair rakhane ka sahas n hua magar aj main bina bulaya mehaman nahin hoon. tumane mujhe bulaya hai aur tumhen apane mehaman ka svagat karana chahie. hriday se n sahi-jahan agni prajvalit ho vahan thndak kahan-baton hi se sahi apane bhavon ko daba kar hi sahi mehaman ka svagat karo. snsar men shatru ka adar mitron se bhi adhik kiya jata hai.

prabha ek kshan ke lie krodh ko shant karo aur mere aparadhon par vichar karo. tum mere oopar yahi dosharopan kar sakati ho ki main tumhen mata-pita ki god se chhin laya. tum janati ho krishn bhagavanh rukmini ko har laye the. rajapooton men yah koee nayi bat nahin hai. tum kahogi isase jhalavadavalon ka apaman hua par aisa kahana kadapi thik nahin. jhalavadavalon ne vahi kiya jo mardon ka dharm tha. unaka purusharth dekh kar ham chakit ho gaye. yadi ve kritakary nahin hue to yah unaka dosh nahin hai. viron ki sadaiv jit nahin hoti. ham isalie saphal hue ki hamari snkhya adhik thi aur is kam ke lie taiyar ho kar gaye the. ve nishshnk the is karan unaki har huee. yadi ham vahan se shighr hi pran bacha kar bhag n ate to hamari gati vahi hoti jo ravasahab ne kahi thi. ek bhi chittaudi n bachata. lekin eeshvar ke lie yah mat socho ki main apane aparadh ke dooshan ko mitana chahata hoon. nahin mujhase aparadh hua hai aur main hriday se us par lajjit hoon. par ab to jo kuchh hona tha ho chuka. ab is bigade hue khel ko main tumhare oopar chhodata hoon. yadi mujhe tumhare hriday men koee sthan mile to main use svarg samajhoonga. doobate hue ko tinake ka sahara bhi bahut hai. kya yah snbhav hai

prabha boli-nahin.

rana-jhalavad jana chahati ho

prabha-nahin.

rana-mndar ke rajakumar ke pas bhej doon

prabha-kadapi nahin.

rana-lekin mujhase yah tumhara kudhana dekha nahin jata.

prabha-ap is kasht se shighr hi mukt ho jaynge.

rana ne bhayabhit drishti se dekh kar kaha jaisi tumhari ichchha aur ve vahan se uth kar chale gaye.

5

das baje rat ka samay tha. ranachhod ji ke mandir men kirtan samapt ho chuka tha aur vaishnav sadhu baithe hue prasad pa rahe the. mira svayn apane hath se thal la-la kar unake age rakhati thi. sadhuon aur abhyagaton ke adar-satkar men us devi ko atmik anand prapt hota tha. sadhugan jis prem se bhojan karate the usase yah shnka hoti thi ki svadapoorn vastuon men kahin bhakti-bhajan se bhi adhik sukh to nahin hai. yah siddh ho chuka hai ki eeshvar ki di huee vastuon ka sadupayog hi eeshvaropasana ki mukhy riti hai. isilie ye mahatma log upasana ke aise achchhe avasaron ko kyon khote ve kabhi pet par hath pherate aur kabhi asan badalate the. munh se nahin kahana to ve ghor pap ke saman samajhate the. yah bhi mani huee bat hai ki jaisi vastuon ka ham sevan karate hain vaisi hi atma bhi banati hai. isalie ve mahatmagan ghi aur khoye se udar ko khoob bhar rahe the.

par unhin men ek mahatma aise bhi the jo ankhen bnd kiye dhyan men magn the. thal ki or takate bhi n the. inaka nam premanand tha. ye aj hi aye the. inake chehare par kanti jhalakati thi. any sadhu kha kar uth gaye parntu unhonne thal chhua bhi nahin.

mira ne hath jod kar kaha-maharaj apane prasad ko chhua bhi nahin. dasi se koee aparadh to nahin hua

sadhu-nahin ichchha nahin thi.

mira-par meri vinay apako manani padegi.

sadhu-main tumhari agya ka palan karoonga to tumako bhi meri ek bat manani hogi.

mira-kahie kya agya hai.

sadhu-manani padegi.

mira-manoongi.

sadhu-vachan deti ho

mira-vachan deti hoon ap prasad payen.

mirabaee ne samajha tha ki sadhu koee mandir banavane ya koee ygy poorn kara dene ki yachana karega. aisi baten nityaprati hua hi karati thin aur mira ka sarvasv sadhu-seva ke lie arpit tha parantu usake lie sadhu ne aisi koee yachana n ki. vah mira ke kanon ke pas munh le ja kar bola-aj do ghnte ke bad rajabhavan ka chor daravaza khol dena.

mira vismit ho kar boli-ap kaun hain

sadhu-mndar ka rajakumar.

mira ne rajakumar ko sir se panv tak dekha. netron men adar ki jagah ghrina thi. kaha-rajapoot yon chhal nahin karate.

rajakumar-yah niyam us avastha ke lie hai jab donon paksh saman shakti rakhate hon.

mira-aisa nahin ho sakata.

rajakumar-apane vachan diya hai usaka palan karana hoga.

mira-maharaj ki agya ke samane mere vachan ka koee mahattv nahin.

rajakumar-main yah kuchh nahin janata. yadi apako apane vachan ki kuchh bhi maryada rakhani hai to use poora kijie.

mira-(soch kar) mahal men ja kar kya karoge

rajakumar-nayi rani se do-do baten.

mira chinta men vilin ho gayi. ek taraph rana ki kadi agya thi aur doosari taraph apana vachan aur usaka palan karane ka parinam. kitani hi pauranik ghatanaen usake samane a rahi thin. dasharath ne vachan palane ke lie apane priy putr ko vanavas de diya. main vachan de chuki hoon. use poora karana mera param dharm hai lekin pati ki agya ko kaise todoon yadi unaki agya ke viruddh karati hoon to lok aur paralok donon bigadate hain. kyon n unase spasht kah doon. kya ve meri yah prarthana svikar n karenge mainne aj tak unase kuchh nahin manga. aj unase yah dan magoongi. kya ve mere vachan ki maryada ki raksha n karenge unaka hriday kitana vishal hai ! nissndeh ve mujh par vachan todane ka dosh n lagane denge.

is tarah man men nishchay karake vah boli-kab khol doon

rajakumar ne uchhal kar kaha-adhi rat ko.

mira-main svayn tumhare sath chaloongi.

rajakumar-kyon

mira-tumane mere sath chhal kiya hai. mujhe tumhara vishvas nahin hai.

rajakumar ne lajjit ho kar kaha-achchha to ap dvar par khadi rahiyega.

mira-yadi phir koee daga kiya to jan se hath dhona padega.

rajakumar-main sab kuchh sahane ke lie taiyar hoon.

6

mira yahan se rana ki seva men pahunchi. ve usaka bahut adar karate the. ve khade ho gaye. is samay mira ka ana ek asadharan bat thi. unhonne poochha-baee ji kya agya hai

mira-apase bhiksha mangane ayi hoon. nirash n kijiega. mainne aj tak apase koee vinati nahin ki par aj ek brahm-phans men phns gayi hoon. isamen se mujhe ap hi nikal sakate hain mndar ke rajakumar ko to ap janate hain

rana-han achchhi tarah.

mira-aj usane mujhe bada dhokha diya. ek vaishnav mahatma ka roop dharan kar ranachhod ji ke mndir men aya aur usane chhal karake mujhe vachan dene par badhy kiya. mera sahas nahin hota ki usaki kapat vinay apase kahoon.

rana-prabha se mila dene ko to kaha

mira-ji han usaka abhipray vahi hai. lekin saval yah hai ki main adhi rat ko rajamahal ka gupt dvar khol doon. mainne use bahut samajhaya bahut dhamakaya par vah kisi bhanti n mana. nidan vivash ho kar jab mainne kah diya tab usane prasad paya ab mere vachan ki laj apake hath hai. ap chahe use poora karake mera man rakhen chahe use tod kar mera man tod den. ap mere oopar jo kripadrishti rakhate hain usi ke bharose mainne vachan diya. ab mujhe is phnde se ubarana apaka kam hai.

rana kuchh der soch kar bole-tumane vachan diya hai usaka palan karana mera karttavy hai. tum devi ho tumhare vachan nahin tal sakate. dvar khol do. lekin yah uchit nahin hai ki vah akele prabha se mulakat kare. tum svayn usake sath jana. meri khatir se itana kasht uthana. mujhe bhay hai ki vah usaki jan lene ka irada karake n aya ho. eershya men manushy andha ho jata hai. baee ji main apane hriday ki bat tumase kahata hoon. mujhe prabha ko har lane ka atynt shok hai. mainne samajha tha ki yahan rahate-rahate vah hil-mil jayagi kintu vah anuman galat nikala. tujhe bhay hai ki yadi use kuchh din yahan aur rahana pada to vah jiti n bachegi. mujh par ek abala ki hatya ka aparadh lag jayaga. mainne usase jhalavad jane ke lie kaha par vah raji n huee. aj tum un donon ki baten suno. agar vah mndar-kumar ke sath jane par raji ho to main prasannatapoorvak anumati de doonga. mujhase kudhana nahin dekha jata. eeshvar is sundari ka hriday meri or pher deta to mera jivan saphal ho jata. kintu jab yah sukh bhagy men likha hi nahin hai to kya vash hai. mainne tumase ye baten kahin isake lie mujhe kshama karana. tumhare pavitr hriday men aise vishayon ke lie sthan kahan

mira ne akash ki or snkoch se dekh kar kaha-to mujhe agya hai main chor-dvar khol doon

rana-tum is ghar ki svamini ho mujhase poochhane ki zaroorat nahin.

mira rana ko pranam kar chali gayi.

7

adhi rat bit chuki thi. prabha chupachap baithi dipak ki or dekh rahi thi aur sochati thi isake ghulane se prakash hota hai yah batti agar jalati hai to doosaron ko labh pahunchati hai. mere jalane se kisi ko kya labh main kyon ghuloon mere jine ki zaroorat hai

usane phir khidaki se sir nikal kar akash ki taraph dekha. kale pat par ujjval tare jagamaga rahe the. prabha ne socha mere andhakaramay bhagy men ye diptiman tare kahan hain mere lie jivan ke sukh kahan hain kya rone ke lie jioon aise jine se kya labh aur jine men upahas bhi to hai. mere man ka hal kaun janata hai snsar meri ninda karata hoga. jhalavad ki striyan mere mrityu ke shubh samachar sunane ki pratiksha kar rahi hongi. meri priy mata lajja se ankhen n utha sakati hongi. lekin jis samay mere marane ki khabar milegi garv se unaka mastak ooncha ho jayaga. yah behayaee ka jina hai. aise jine se marana kahin uttam hai.

prabha ne takiye ke niche se ek chamakati huee katar nikali. usake hath kanp rahe the. usane katar ki taraph ankhen jamayin. hriday ko usake abhivadan ke lie mazaboot kiya. hath uthaya kintu hath n utha atma dridh n thi. ankhen jhapak gayin. sir men chakkar a gaya. katar hath se chhoot kar zamin par gir padi.

prabha kruddh ho kar sochane lagi-kya main vastav men nirlajj hoon main rajapootani ho kar marane se darati hoon man-maryada kho kar behaya log hi jiya karate hain. vah kaun-si akanksha hai jisane meri atma ko itana nirbal bana rakha hai. kya rana ki mithi-mithi baten rana mere shatru hain. unhonne mujhe pashu samajh rakha hai jise phnsane ke pashchath ham pinjare men bnd karake hilate hain. unhonne mere man ko apani vakh-madhurata ka krida-sthal samajh liya hai. ve is tarah ghuma-ghuma kar baten karate hain aur meri taraph se yuktiyan nikal kar unaka aisa uttar dete hain ki jaban hi bnd ho jati hai. hay ! nirdayi ne mera jivan nasht kar diya aur mujhe yon khelata hai ! kya isilie jioon ki usake kapat bhavon ka khilauna banoon

phir vah kaun-si abhilasha hai kya rajakumar ka prem unaki to ab kalpana hi mere lie ghor pap hai. main ab us devata ke yogy nahin hoon priyatam ! bahut din hue mainne tumako hriday se nikal diya. tum bhi mujhe dil se nikal dalo. mrityu ke sivay ab kahin mera thikana nahin hai. shnkar ! meri nirbal atma ko shakti pradan karo. mujhe karttavy-palan ka bal do.

prabha ne phir katar nikali. ichchha dridh thi. hath utha aur nikat tha ki katar usake shokatur hriday men chubh jay ki itane men kisi ke panv ki ahat sunayi di. usane chaunk kar sahami drishti se dekha. mndar-kumar dhire-dhire pair dabata hua kamare men dakhil hua.

8

prabha use dekhate hi chaunk padi. usane katar ko chhipa liya. rajakumar ko dekh kar use anand ki jagah romanchakari bhay utpann hua. yadi kisi ko jara bhi sndeh ho gaya to inaka pran bachana kathin hai. inako turnt yahan se nikal jana chahie. yadi inhen baten karane ka avasar doon to vilamb hoga aur phir ye avashy hi phns jayenge. rana inhen kadapi n chhodenge. ye vichar vayu aur bijali ki tivrata ke sath usake mastishk men daude. vah tivr svar men boli-bhitar mat ao.

rajakumar ne poochha-mujhe pahachana nahin

prabha-khoob pahachan liya kintu yah baten karane ka samay nahin hai. rana tumhari ghat men hain. abhi yahan se chale jao.

rajakumar ne ek pag aur age badhaya aur nirbhikata se kaha-prabha tum mujhase nishthurata karati ho.

prabha ne dhamaka kar kaha-tum yahan thaharoge to main shor macha doongi.

rajakumar ne uddndata se uttar diya-isaka mujhe bhay nahin. main apani jan hatheli par rakh kar aya hoon. aj donon men se ek ka ant ho jayaga. ya to rana rahenge ya main rahoonga. tum mere sath chalogi

prabha ne dridhata se kaha-nahin.

rajakumar vyngy bhav se bola-kyon kya chittaud ki jalavayu pasnd a gayi

prabha ne rajakumar ki or tiraskrit netron se dekh kar kaha-snsar men apani sab ashaen poori nahin hotin. jis tarah yahan main apana jivan kat rahi hoon vah main hi janati hoon kintu lok-ninda bhi to koee chiz hai ! snsar ki drishti men main chittaud ki rani ho chuki. ab rana jis bhanti rakhen usi bhanti rahoongi. main ant samay tak unase ghrina karoongi jaloongi kudhoongi. jab jalan n sahi jayagi to vish kha loongi ya chhati men katar mar kar mar jaoongi lekin isi bhavan men. is ghar ke bahar kadapi pair n rakhoongi.

rajakumar ke man men sndeh hua ki prabha par rana ka vashikaran mntr chal gaya. yah mujhase chhal kar rahi hai. prem ki jagah eershya paida huee. vah usi bhav se bola-aur yadi main yahan se utha le jaoon prabha ke tivar badal gaye. boli-to main vahi karoongi jo aisi avastha men kshatraniyan kiya karati hain. apane gale men chhuri mar loongi ya tumhare gale men.

rajakumar ek pag aur age badha kar yah katuvaky bola-rana ke sath to tum khushi se chali ayi. us samay chhuri kahan gayi thi

prabha ko yah shabd shar-sa laga. vah tilamila kar boli-us samay isi chhuri ke ek var se khoon ki nadi bahane lagati. main nahin chahati thi ki mere karan mere bhaee-bndhuon ki jan jay. isake sivay main kunvari thi. mujhe apani maryada ke bhng hone ka koee bhay n tha. mainne pativrat nahin liya. kam se kam snsar mujhe aisa samajhata tha. main apani drishti men ab bhi vahi hoon kintu snsar ki drishti men kuchh aur ho gayi hoon. lok-laj ne mujhe rana ki agyakarini bana diya hai. pativrat ki bedi jabaradasti mere pairon men dal di gayi hai. ab isaki raksha karana mera dharm hai. isake viparit aur kuchh karana kshatraniyon ke nam ko kalnkit karana hai. tum mere ghav par vyarth namak kyon chhidakate ho yah kaun-si bhalamanasi hai mere bhagy men jo kuchh bada hai vah bhog rahi hoon. mujhe bhogane do aur tumase vinati karati hoon ki shighr hi yahan se chale jao.

rajakumar ek pag aur badha kar dusht-bhav se bola-prabha yahan a kar tum triyacharitr men nipun ho gayi. tum mere sath vishvasaghat karake ab dharm ki ad le rahi ho. tumane mere pranay ko pairon tale kuchal diya aur ab maryada ka bahana dhoondh rahi ho. main in netron se rana ko tumhare saundary-pushp ka bhramar banate nahin dekh sakata. meri kamanaen mitti men milati hain to tumhen le kar jayengi. mera jivan nasht hota hai to usake pahale tumhare jivan ka bhi ant hoga. tumhari bevaphaee ka yahi dnd hai. bolo kya nishchay karati ho is samay mere sath chalati ho ya nahin kile ke bahar mere adami khade hain.

prabha ne nirbhayata se kaha-nahin.

rajakumar-soch lo nahin to pachhataogi.

prabha-khoob soch liya.

rajakumar ne talavar khinch li aur vah prabha ki taraph lapake. prabha bhay se ankhen band kiye ek qadam pichhe hat gayi. maloom hota tha use moorchchha a jayagi.

akasmath rana talavar liye veg ke sath kamare men dakhil hue. rajakumar snbhal kar khada ho gaya.

rana ne sinh ke saman garaj kar kaha-door hat. kshatriy striyon par hath nahin uthate.

rajakumar ne tan kar uttar diya-lajjahin striyon ki yahi saza hai.

rana ne kaha-tumhara vairi to main tha. mere samane ate kyon lajate the. jara main bhi tumhari talavar ki kat dekhata.

rajakumar ne ainth kar rana par talavar chalayi. shastr-vidya men rana ati kushal the. var khali de kar rajakumar par jhapate. itane men prabha jo moorchchhit avastha men divar se chimati khadi thi bijali ki tarah kaundh kar rajakumar ke samane khadi ho gayi. rana var kar chuke the. talavar ka poora hath usake kndhe par pada. rakt ki phuhar chhootane lagi. rana ne ek thndi sans li aur unhonne talavar hath se phenk kar girati huee prabha ko snbhal liya.

kshanamatr men prabha ka mukhamndal varnahin ho gaya. ankhen bujh gayin. dipak thnda ho gaya. mandar-kumar ne bhi talavar phenk di aur vah ankhon men ansoo bhar prabha ke samane ghutane tek kar baith gaya. donon premiyon ki ankhen sajal thin. patinge bujhe hue dipak par jan de rahe the.

prem ke rahasy nirale hain. abhi ek kshan hua rajakumar prabha par talavar le kar jhapata tha. prabha kisi prakar usake sath chalane par udyat n hoti thi. lajja ka bhay dharm ki bedi karttavy ki divar rasta roke khadi thi. parantu use talavar ke samane dekh kar usane us par apana pran arpan kar diya. priti ki pratha nibah di lekin apane vachan ke anusar usi ghar men.

han prem ke rahasy nirale hain. abhi ek kshan pahale rajakumar prabha par talavar le kar jhapata tha. usake khoon ka pyasa tha. eershya ki agni usake hriday men dahak rahi thi. vah rudhir ki dhara se shant ho gayi. kuchh der tak vah achet baitha rota raha. phir utha aur usane talavar utha kar zor se apani chhati men chubha li. phir rakt ki phuhar nikali. donon dharaen mil gayin aur unamen koee bhed n raha.

prabha usake sath chalane par raji n thi. kintu vah prem ke bandhan ko tod n saki. donon us ghar hi se nahin snsar se ek sath sidhare.

tika tippani aur sndarbh


snbndhit lekh

varnamala kramanusar lekh khoj

a   a    i    ee    u    oo    e    ai    o   au    an    k   kh    g    gh    n    ch    chh    j    jh    n    t    th    d   dh    n    t    th    d    dh    n    p    ph    b    bh    m    y    r    l    v    sh    sh    s    h    ksh    tr    gy    ri    ri    aau    shr   aah